Pagdumala sa mga pansayan sa Cogon, Carmen gipaabot mabalhin sa CEED

PABORABLENG gisuportahan nila ni Konsehal Ian Mark Nacaya, chairman sa komite sa economic enterprises, ug Konsehal Aga Suan ang laraw nga matunol sa City Economic Enterprises Department (CEED) ang pagdumala sa mga pansayan sa merkado sa Cogon ug Carmen.

Kini human nagtigom ang komite ni Nacaya niadtong Martes og mituki sa hangyo sa hepe sa CEED nga matabangan dinha sa lakang nga makansela ang pagdumala sa UKC Builders sa tanang pansayan sa merkado sa Cogon ug Carmen lakip na ang opisina nga gigamit sa UKC.

Sa tigom, si Suan mibutyag nga sayang ang kita sa dakbayan sa padayong operasyon sa UKC kun ang kontrata nga naghatag kanila sa katungod ni-expire na.

Nasayran nga mokabat sa P130 mil ang kinitaan sa maong mga pansayan sa merkado matag bulan.

Hinuon, si Nacaya miingon nga kinahanglang maseguro nga lakip sa matunol mao ang water system nga gigamit sa mga pansayan ug usab matino nga siento porsyento nang andam ang CEED nga modumala sa mga pansayan sa panahon nga bawion na kini gikan sa pagdumala sa UKC.

Ang tigom sa komite gitambongan usab ni Konsehal Jay Pascual.