Pagdili sa pagbaligya og sigarilyo, ilimnon sa minor de edad gisuportahan ni Tabac

HUGOT nga gisuportahan sa komite sa barangay affairs ubos ni Konsehal Marlo Tabac ang ordinansa sa Barangay Indahag nga nagdili  sa mga sari-sari store ug convenience store sa ilang barangay sa pagbaligya og ilimnong makahubog, sigarilyo ug ingon man electronic cigarettes ngadto sa mga minor de edad ug nagpahamtang og multa alang sa makalapas niini.

Sa tigom sa komite kagahapon, si Indahag SK Chairman John Floyd Labiano mibutyag nga kapila na siya nakakita og mga minor de edad nga gapanigarilyo, butang   nga nakapa-aghat kanila sa pagpalabang  sa maong  ordinansa aron  mapitol  ug mapasidad-an ang mamaligyaay og sigarilyo ngadto sa mga minor de edad.

Hinoon, gipasabot ni Kapitan Tabac nga sa mga tindahan nga dili  gayod gapatuo  taliwala sa kapila ka higayon nga gipahimangnoan, mahimong  ikanselar sa barangay ang ilang barangay clearance ug irekomendar sa Business Permits and Licensing Division   ang pagkanselar sa ilang business permit.

Ang ordinansa sa Indahag  giduso sa komite ngadto sa City Legal Office alang sa dugang pagtuon ug rekomendasyon. (JRG/SP)