Pag-revise sa Animal Control and Welfare Ordinance padayong gitun-an

PADAYONG gitun-an sa komite sa agriculture ubos ni Konsehal Jay Roa Pascual ug komite sa health, nutrition and health insurance ni Konsehal Malou Gaane ang lakang pag-revise sa Ordinance No. 9852-2005 nga naila isip Animal Control and Welfare Ordinance sa dakbayan.

Kini human mipresentar sa milabayng tigom si Acting City Veterinarian Dr. Helen Ann Tacandong sa draft amendatory ordinance.

Atol sa maong tigom, si Konsehal Ian Mark Nacaya, kinsa maoy nangamahan sa Ordinance No. 9852-2004, mipadayag sa iyang hugot nga suportado ang lakang pag-revise sa maong ordinansa, ug misugyot nga madugang ang probisyon alang sa  pagtukod og animal clinic.

Lakip usab sa iyang gisugyot ang paghimo sa usa ka division diha sa City Veterinary Office nga maoy direktang responsable sa pagdumala sa pagahimoong barangay animal control and welfare committee.

Niini, gitahasan si Dr Tacandong sa paghan-ay sa maong draft revised ordinance aron maduso ngadto sa buhatan sa City Legal Office alang sa tukmang opinyon ug rekomendasyon.

Mitambong sa tigom sila si Konsehal Aga Suan ug Bernie Esparcia kinsa mipadayag sa ilang hugot nga suporta sa maong lakang sa tinguha nga maatiman ang mga hayop panahon sa katalagman. (RNQuiblat/SP)