Pag-reconstitute sa Task Group Firecrackers gihangyo

GIHANGYO sa komite sa trade and commerce ni Konsehal George Christopher Goking si Mayor Klarex Uy sa pag-isyu og Executive Order nga mag-reconstitute sa Task Group on Firecrackers and Other Pyrotechnic Devices sa dakbayan.

Kini human hiniusang nagtigom ang komite sa trade and commerce ni Konsehal Goking uban sa economic enterprises ni Konsehal Edgar Cabanlas, consumer protection ni Konsehal Jonjon Rodriguez, ug public order ni Konsehal Roger Abaday diin gituki ang panawagan ni Konsehal Goking nga mamonitor ang naggamit ug nagbaligya sa mga sub-standard electronic Christmas decorations ug sa mga illegal nga pabuto dinhi sa syudad.

Matod ni Department of Trade and Industry-Misamis Oriental Director Jesusa Abear nga tinuig ang gahimoong pag-inspeksyon sa task group diin gihatagan og gahom sa pag-regulate sa pagbaligya ug paggamit sa mga pabuto subay sa Republic Act 7183, ang balaod nga nag-regulate sa pagbaligya, paghimo, pag-apod-apod, ug paggamit sa mga pabuto ingon man sa kasamtangan nga mga regulasyon sa Department of Interior and Local Governments (DILG).

Gihangyo usab sa komite nga makalatid sa kamandoan nga mag-ila sa mga tindahan ug lugar alang sa pagpalit sa mga pabuto ug ang pagpamaligya niini tugotan lamang gikan sa Disyembre 16 hangtod 31, ning tuig.

Ang maong tigom gitambongan usab nila ni Konsehal Aga Suan, Gigi Go, ug Al Legaspi, Sr. (RNQ/SP)