Pag-akredit sa retail, service enterprises sa DTI gisuportahan

Kusganong gisuportahan ni Konsehal Aga Suan ang lakang nga mahimong usa sa mga rekisitos sa paglukat og business permit ang akreditasyon sa mga retail ug service enterprises (SREs) dinha sa Department of Trade and Industry (DTI).

Tumong sa maong lakang nga maprotektahan ang mga kliyente o’ konsumedor nga nagkinahanglan sa serbisyo sa maong mga retail ug service enterprises.

Hinuon, iyang gihangyo nga ma-classify ang mga patigayon aron kadtong mga gagmayng negosyo dili na kinahanglan nga ma-akredit tungod kay dako iyang katahap nga mahimo silang “fly by night” nga mga negosyo panahon nga dili ma-akredit ug dili makalukat sa gikinahanglang panugot.

“Mahimong maapektohan ang ekonomiya kun kini mahitabo,” pamahayag ni Suan.

Siya midugang nga labing maayo kun adonay klasipikasyon sa mga negosyo sa nga nalambigit sa retail ug service enterprises ug lantawon ang mga puhunan ug klase sa serbisyo kun professional o non-professional.