Pag-abli sa operasyon sa mga bulangan giuyonan

HINIUSANG gisuportahan sa konseho sa syudad ubos ni Bise Mayor Jocelyn Rodriguez ang resolosyon nga maghatag og panugot sa subling pag-abli sa operasyon sa mga bulangan sa syudad human sa kapin sa duha ka tuig nga temporaryong nasira gumikan sa nasinating pandemia.

Si Konsehal Roger Abaday, chairman sa komite sa games and amusement, kinsa maoy nangamahan sa gipasakang resolosyon, miingon nga unta matugotan na ang maong matang sa operasyon aron makabakod ug matabangan ang mga tag-iya, tigdumala ug mga trabahante sa ilang negosyo.

Matod ni Abaday nga andam kanunayng mosunod ang tigdumala sa tanang mga lagda ug gabayan nga gipatuman sa Inter Agency Task Force (IATF) ug ang pagsunod sa minimum health standard nga gipatuman sa Department of Health (DOH) lakip niini ang pag-implementar sa cashless basis.

Malaumon si Abaday nga makatabang sa dugang kinitaan sa syudad ug makatabang sa ekonomiya ang subling pag-abli sa operasyon sa mga bulangan sa syudad. (SP/MLRapanot)