Opisyal nga paggamit sa pulong ‘Maayad’sa pagpanimbaya, gisuportahan ni Cabaring

GIKALIPAY ni   Konsehal Roberto Cabaring, chairman sa komite sa cultural communities, ang sugyot nga maoy gamitong opisyal nga pulong sa pagpanimbaya ang pulongan ‘Maayad’.

Kini ang reaksyon sa Konsehal sa special report ni Konsehal Girlie Balaba sa sesyon  niadtong Lunes nga gidumala ni Bise Mayor Bebot Rodriguez kabahin sa sugyot nga himoong opisyal nga pulong sa pagpanimbaya ang “Maayad” labina sa mga service-oriented establishments sama sa hotel, restaurants ug uban pa.

Matod ni Cabaring nga nalipay siya tungod kay sa kadugay sa panahon napasidunggan sila dili lamang sa kabukiran apan apil na sa kapatagan mao nga suportado kaayo niya ang maong lakang tungod kay sagrado kini sa katigulangan.

Sumala sa konsehal nga walay laing maayo kon dili ang Diyos lang mao nga ilang gitamod nga ang tanang butang kinahanglan nga magsugod gayod sa maayo kay kon sayop sa pagsugod palang mahimong sayop na kini paingon sa katapusan.

Nanghinaot si Cabaring suportahan ug maaprobahan sa Konseho ang maong sugyot ni Konsehal Balaba. (JRG/SP)