top of page

Nacaya misugyot magamit pundong gitagana alang sa proyekto sa panubig

Adunay gitagana ang kagamhanan sa dakbayan nga pundo nga andam ipahulam sa Cagayan de Oro Water District (COWD) alang sa pagpatuman og mga proyekto sa panubig.


Mao kini ang gibutyag ni Konsehal Ian Mark Nacaya, atol sa sesyon sa konseho niadtong Lunes nga gidumala ni Presiding Officer Protempore Konsehal Romeo Calizo, human gipresentar sa kadagkoan sa COWD ang tukmang kahimtang sa panubig sa dakbayan ingon man ang ilang mga gilaraw nga proyekto.


Matod ni Nacaya nga sa milabayng administrasyon, adunay P600 milyones nga gitagana ang dakbayan alang sa matumbok nga mga proyekto sa panubig. Gani, adunay resolosyon nga gipasaka ang konseho ug ang board sa COWD nga nag-uyon ug naghatag sa kapasidad sa mayor nga magtumbok sa mga proyekto.


Siya malaumon nga magamit sa Water District ang maong pundo pinaagi sa pagsumete ngadto sa mayor sa mga proyekto nga magpalapad sa ilang serbisyo sa katawhan. Unta lakip sa makonsidera mao ang dugang nga supply sa tubig bisan dinha sa Macabalan, Carmen, Patag, Gusa, Macasandig, Nazareth ug Camaman-an nga padayong nag-antos sa kahinay sa agas sa tubig sa ilang mga gripo, dugang ni Nacaya.


Niini, si Engr. Antonio Young, bag-ong general manager sa Water District, miingon nga sa milabayng mga tuig, adunay gidusong sugyot ang kadagkoan sa Water District nga mga proyekto ngadto sa dakbayan apan gumikan sa nahitabong pandemya, ang pundo nga unta alang sa panubig nagamit sa pagtubag sa panginahanglanon sa dakbayan kontra sa Covid-19.


Sa kasamatangan, adunay P1.9 bilyones balor nga project proposal ang Water District aron matubag ug masolosyonan ang panginahanglanon sa supply sa tubig ug ilang konsiderahon ang subling pagdangop sa dakbayan aron mapundohan ang pipila sa ilang gilaraw nga mga proyekto, pamahayag ni Young.






Comentários


bottom of page