Mr David gipahalipayan sa konseho

GIPAHALIPAYAN sa Konseho sa Syudad ubos ni Bise Mayor Bebot Rodriguez si Mr. Steven Brielle S David, CPA.

Sa sesyon niadtong Lunes hiniusang gisagop sa Konseho ang resolusyon nga nagpahalipay ug nagdayeg kaniya human nasakmit ni David ang Top 8 nga puwesto sa 3,004 nga nakapasar  sa Certified Public Accountant Licensure Examination (CPALE) nga gipahigayon niadtong Mayo 2026.

Nasayran nga si David migradwar isip Magna Cum Laude sa Xavier University – Ateneo de Cagayan, niadtong tuig 2025.

Ang iyang talagsaon nga kalamposan naghatag inspirasyon sa uban ug usa ka dakong dungog ug garbo sa dakbayan.

Ang resolusyon alang sa maong katuyoan gipangamahanan ni Konsehal Jing Daba, chairman sa komite sa edukasyon sa konseho. (RNQ/SP/Photo by: xu.edu.ph)