Mga tindahan sa Nazareth gidid-an pagbaligya sa ilimnong makahubog, sigarilyo sa minor de edad

HINGPIT nang mapatuman sa Barangay Nazareth ang ilang ordinansa nga nag-dili  sa mga tindahan o indibidwal sa pagbaligya og ilimnong makahubog ug sigarilyo ngadto  sa mga minor de edad ug nag-regulate sa pagpamaligya  sa mga tindahan nga nahimutang duol sa mga tunghaan.

Kini human ang konseho sa syudad atol sa sesyon nga gidumala ni Bise Mayor Bebot Rodriguez misagop og resolusyon nga nag-uli sa  maong ordinansa ngadto sa Brgy. Nazareth alang sa hingpit nga implementasyon.

Nalatid  sa maong ordinansa nga gidid-an gayud ang mga tindahan  o  indibidwal sa pagbaligya og mga ilimnong makahubog ug  sigarilyo sa mga indibidwal nga nagpangedaron 18 anyos paubos, samtang  gimanduan nga kinahanglan ila unang sutaon ang insaktong edad niini pinaagi sa paglantaw  sa  valid identification card ayha kini baligyaan.

Adunay multa nga ipahamtang balor P500 ug 8 ka oras nga community service alang sa unang kalapasan, P750 ug 16 ka adlaw nga community service sa ikaduhang kalapasan ug P1 ka libo ug 24 ka oras nga community service ug blacklisting sa establisamento sa ikatulong kalapasan.

Ang resolusyon  nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Edgar Cabanlas. (JRG/SP/Photo credit: Marketmind Local)