Mga programa sa kababayen-an suportado ni Dahino

Gipadayag ni Konsehal Des Dahino, chairperson sa komitiba sa women and family relations, ang iyang hugot nga suporta sa programa nga ANDAM EBA 5.0, usa ka programa nga nagtinguhang mapalig-on ang kababayen-an, ilabi na ang mga solo mothers sa dakbayan.

Ang maong programa nga gipasiugdahan sa Andam Higala, usa ka non-government organization, adunay unom ka-buwan nga livelihood training nga nagtudlo sa mga partisipante og kahanas sa pagnegosyo ug pagpalig-on sa ilang kooperatiba aron makab-ot ang mas lig-on nga panginabuhian.

Gipasabot ni Konsehal Dahino nga ang tinuod nga pag-empower sa kababayen-an magsugod pinaagi sa paghatag kanila og kahibalo, pagsalig, ug kahanas aron sila mismo makahimo sa ilang kaugmaon.

Dugang niya, padayon siyang motabang sa mga programa nga nagpalambo sa kababayen-an ug sa ilang papel sa komunidad. (SPE/SP)