Maayo nga serbisyo sa panubig ang gikinahanglan – Bebot

“KUN maayo ang serbisyo ngadto sa katawhan, dali masabtan kun aduna may mga omento o’ kabag-ohan nga ipatuman.”

Mao kini ang pamahayag ni Bise Mayor Bebot Rodriguez, atol sa sesyon sa konseho niadtong Martes, human gipaabot ni Cagayan de Oro Water District (COWD) General Manager Engr. Antonio Young ang nakompletong Comprehensive 10-Year Development Plan.

Sa maong plano gisaysay ang tumong sa pagpalambo nga naglakip sa sustainability ug efficacy sa sistema sa supply sa panubig sa tibouk Cagayan de Oro.

Niini, ang bise mayor nakisayod kun ang COWD padayon ba sa pakigtambayayong sa Rio Verde ug MetroPac kay dili pwede nga dili usab sila mokita.

Iyang gisaysay nga base sa Commission on Audit (COA) report sa tuig 2021, adunay P190 milyones nga pundo sa Water District nga wala nagamit nga ang tumong mao ang paghatag og kalamboan sa serbisyo ngadto sa katawhan.

“Gani adunay daghang leakages, hugaw ang tubig ug daghan pang molo sa katawhan nga wala maaksyonan. Ang maong kantidad nagamit unta paghatag og solusyon sa maong mga isyu,” dugang pasabot sa bise mayor.

Hinuon, si Engr. Young mipasabot nga wala ma-realize ang target sa COWD nga revenue sa maong tuig tungod sa nahitabong pandemic diin daghan ang nagsirado nga mga negosyo hinungdan usab sa nahiagumang alkanse kompanya.