top of page

Limitasyon sa gibug-aton sa mga trak gisugyot


Si Konsehal John Michael Seno, chairman sa komite sa public works, misugyot sa pagpahamtang og limitasyon sa gibug-aton sa mga dagkong trak nga moagi sa kadalanan sa kabarangayan sa syudad.

Kini ang unod sa taho ni Seno atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Sa pakisusi sa konsehal nga daghan na kaayo ang lubak-lubak sa kadalanan labina gikan diha sa Barangay Camama-an lahos sa Taguanao padulong sa Mastersons Avenue ug Barangay Canitoan – Pagatpat, ning syudad.

Gani, daghan ang iyang nadawat nga taho ug reklamo sa disgrasya dala sa sobra ka lubak-lubak sa kadalanan sa nahisgotang mga dapit.

Matod ni Seno nga usa sa hinungdan sa pagkadaot sa kadalanan mao ang pag-agi sa mga dagkong trak nga adunay bug-at nga karga ug gaawas-awas ang tubig kay basa pa gikan sa quarry.

Dugang sa konsehal nga bisan bag-o pa kaayo gihimo ang dalan nadaut na tungod seguro sa kabaga-on sa semento. Apan, bisan unsa pa kabaga sa maong dalan kung maagain dayon sa puno kaayo nga trak ug sobra kabug-at makaguba gayud kini sa dalan.

Niini, si Seno malaumon nga mahatagan sa aksyon ang maong obserbasyon ug unta adunay balaod nga maomentohan ang gilatid nga limitasyon sa gibug-aton sa mga dagkong trak o’ dili paagian nga basa pa ang karga nga moagi sa syudad aron malikayan ang paspas nga pagkadaut sa kadalanan.

コメント


bottom of page