Legaspi mitahas sa CUPLAI, GVHA pagsumite sa mga dokumento sa pagpanag-iya

BUOT ni Konsehal Al Legaspi, Sr., chairman sa komite sa urban and rural poor, nga mahatagan sa patas nga rekomendasyon ang hangyo sa duha ka kapunongan diha sa Barangay Cugman.

Atol sa miaging tigom, naglibog ang konsehal sa pagtumbok sa tinuod nga nanag-iya sa luna nga gi-okupahan sa Green Village Homeowners Association, Incorporated ug sa Cugman Urban Poor Livelihood Association (CUPLAI) diin ang duha ka pundok mi-insister nga sila girekognisar ug akreditado sa City Planning and Development Office (CPDO) ug rehistrado sa Securities and Exchange Commission (SEC) ug uban pa.

Niini, gitahasan ni Konsehal Legaspi ang duha ka asosasyon sa pagsumite sa tanang matang sa dokumento sa pagpanag-iya aron sa ingon matun-an sa buhatan sa City Housing and Urban Development Department (CHUDD) alang sa tukmang rekomendasyon.

Alayon usab niini, ang maong isyu giduso sa komite ngadto sa buhatan sa City Assessor alang sa pagtumbok sa lehitimo ug tinuod nga tag-iya sa maong luna. (RNQ/SP)