Konseho mipasalamat sa PDEA

DAKO ang pasalamat sa Konseho sa syudad ubos ni Bise Mayor Bebot Rodriguez sa kadagkoan ug mga kawani sa rehiyonal nga buhatan sa Philippine Drug Enforcement Agency (PDEA-10) sa pagpahigayon og random drug testing sa tanang sakop sa konseho atol sa sesyon niadtong Lunes.

Kini nunot sa gipatumang palisiya sa Civil Service Commission (CSC) nga nagmando alang sa mandantory drug testing sa tanang opisyal ug mga kawani sa gobyerno.

Sa Resolution No. 1700653 sa CSC nga nagpatuman sa mandatory drug testing, gitinguha nga masegurong drug-free ang mga buhatan sa gobyerno alang sa epektibong pagserbisyo sa katawhan.

Ang maong lakang pinasubay sa 1987 Constitution ug Administrative Code of 1987.

Niini, si Bise Mayor Rodriguez uban sa 17 ka mga sakop sa konseho boluntaryong mipailalom sa maong surprise drug test. (SP/JNortiza)