top of page

Konsehal Seno nangusog masolusyonan problema sa pagbaha sa uptown area

DALING giaksyonan sa komite sa public works ni Konsehal John Michael Seno ang mulo nga gipaabot sa Federation of Uptown Village Homeowners Association (FUVHOA) kalabot sa problema sa kanunay nga pagbaha diha sa Masterson Avenue panahon sa ting-ulan.


Kini human ang kadagkoan sa federasyon, sa milabayng tigom sa komite, mipadayag sa ilang mulo ug problema mahitungod sa kanunay nga pagbaha sa dapit nga nakahatag og kahasol sa mga nanimuyo sa ibabawng bahin sa syudad.


Si Seno miingon nga kinahanglan nga mahatagan sa igong pagtagad ang mulo ilabina nga dili lang kini sa uptown area lang kun dili lakip sa ubang kabarangayan. Adunay gayud problema sa mga dalan tungod kay halos tanang kanal wala magkonektar sa drainage ug adunay uban niini nga gisirad-an na maong dili na makalahos ang tubig, dugang ni Seno.

Niini, siya nangusog nga ma-imbentaryo ang tanang kanal sa syudad aron masuta ang mga dapit nga daling magbaha. Sa iyang bahin, si Konsehal Aga Suan misugyot sa daling aksyon pinaagi sa paghangyo sa City Engineer’s Office pagsusi sa tanang drainage system sa uptown area.


Subay niini, ang komite ni Seno mipasaka og duha ka resolusyon nga naghangyo sa DWPH pag-alokar og igong pundo alang sa drainage system sa Masterson Avenue ug resolusyon nga naghangyo ni Kongresman Lordan Suan sa unang distrito nga kun adunay mga proyekto nga dili pa ipatuman didto nalang una i-alokar ug hatagan sa prioridad ang drainage system sa dapit.




Commentaires


bottom of page