Konsehal Rodriguez napili isip Chairperson sa komite sa Social Services

Konsehal Rodriguez napili isip Chairperson sa komite sa Social Services

GIPADAYAG ni Konsehal Maximo “Jonjon” T. Rodriguez ang iyang dakong kadasig ug pagpasalamat nga mangulo sa komite sa Social Services.

Gitudlo si Konsehal Jonjon isip bag-ong Chairperson, kauban si Konsehal Paolo Nicolo Gaane isip Vice Chairperson. Sakop usab sa maong komite sila Konsehal Gilda O. Go, Konsehal Juancho R. Pascual, ug Konsehal Moreno Y. Daba IV.

Ang komite sa Social Services maoy nagatutok sa mga isyu kabahin sa social welfare, public service, ug social development. Ilang pagatubagon ang mga panginahanglanon ug kalabotang isyu sa mga Persons with Disabilities (PWDs), mga indibidwal nga adunay espesyal nga panginahanglan, ug pagmugna og mga inisyatibo alang sa mas maayong kalidad sa kinabuhi sa komunidad.

Sa pagsugod sa iyang termino, unang gibisita ni Konsehal Jonjon ang Psychosocial Division sa City Social Welfare and Development (CSWD) aron personal niyang mapaminaw ang mga kasinatian sa mga frontline workers ug mas masabtan ang ilang mga hagit sa paghatud sa serbisyo.

Gisaad ni Konsehal Jonjon nga ubos sa iyang liderato, paningkamotan sa komite nga mapalambo ang mga palisiya ug programang inklusibo nga makahatag ug dugang kaayohan sa tanang Kagay-anon—ilabi na sa mga kabus ug kadtong adunay espesyal nga panginahanglan. (JDOpema/SP)