Konsehal Rodriguez miduyog sa kampanya sa suicide prevention

MIDUYOG si Konsehal Jonjon Rodriguez, chairman sa committee on social services, sa kampanya sa dakbayan batok sa suicide nga gitawag “Ayaw og Buhi!” nunot usab sa pagsaulog sa Suicide Prevention Awareness Month karong bulana.

 “Sa akong paglingkod isip miyembro sa 21^st City Council, akong nasaksihan ang makalilisang nga pagsaka sa mga kaso sa suicide diri sa atong dakbayan. Isip aksyon niini, atong palig-onon ang atong Psychosocial Unit, dugangan ang mga mental health workers, ug ipatuman ang Cagayan de Oro Mental Health Board,” matod ni Konsehal Rodriguez.

Dili pa lang usab dugay, mihimo si Konsehal Rodriguez og special report kalabot sa paghatag og dugang kawani, sakyanan ug uban pa sa CSWD Psychosocial Unit aron mas mapalambo ang mental health services alang sa mga Kagay-anon.

Siya midugang nga kinahanglan usab palig-onon ang mental health awareness, pinaagi sa pagpahigayon og mga programa diha sa mga tunghaan ug kabarangayan.

Naghatag usab ang konsehal og pulong pagdasig ngadto sa mga Kagay-anon: “Mga igsuon, wala kamo nag-inusara. Ayaw og buhi. Adunay mga tawo nga andam maminaw ug motabang ninyo.”

“Magtinabangay ta aron mapanalipdan ang atong mga kaigsuonan ug mapalig-on ang atong komunidad,” dugang ni Konsehal Rodriguez. (JDO/SP/Photo captured from Councilor Rodriguez's videoclip)