top of page

Kon. Seno nangusog malimpyo kadalanan sa illegal nga mga straktura

Padayong naninguha ang komite sa public works ni Konsehal John Michael Seno nga malimpyo ang kadalanan gikan sa mga illegal nga natukod nga dagkong billboards.

Sa milabayng tigom sa komite, giawhag ni Seno ang kadagkoan sa buhatan sa Building Official (OBO) paghatag sa igong pagtagad nga malokatan sa gikinahanglang permit sa Pryce Plaza Hotel ang ilang nainstalar nga billboard diha sa Masterson Avenue.

Kini human nasayran sa komite nga ang billboard nga natukod sa loteng gipanag-iyahan sa Pryce wala pay signage o billboard permit gikan sa OBO.

Nasayran nga niadtong 2020 gipada-an na og notice ang tagdumala sa Pryce apan matod pa nga hangtod sa kasamtangan wala gihapon kiniy aksyon.

Mga sari sari store galukat og signage permit unya sila nga dakong kompanya walay permit, pamahayag ni Seno.

Sa ilang bahin, ang representante sa DPWH Engineering Office mibutyag nga ang lona nga gitukuran sa billboard gipanag-iyahan sa Pryce ug gitangtang kini sa DPWH ubos sa kondisyon nga sa panahon nga mahuman ang proyekto sa slope protection ila kining ibalik sa nahimutangan.

Hinuon, gipasalig sa taga-Pryce Plaza nga ilang lihokon sa labing daling panahon ang pagproseso sa maong permit.


Comentários


bottom of page