Kapitan, mga kauban sa Brgy 31 gireklamo

HUGOT nga gihangyo ni Konsehal Yan Lam S. Lim, chairman sa komite sa barangay affairs, sa sesyon niadtong Lunes nga gidumala ni presiding officer protempore Konsehal Edgar Cabanlas, nga mapahigayon ang special audit diha sa Barangay 31.

Kini human gitaho ang gipasakang reklamo sa pipila ka kagawad sa Barangay 31 batok sa ilang kapitan ug mga kauban mahitungod sa giingong ghost activity.

Gitumbok sa reklamo ang giingong pag-alokar sa barangay og pundo alang sa usa ka Basketball Tournament –Women’s Division apan matod pa walay gipahigayon nga aktwal nga torneyo. Gani, sa gipahigayong pagtuki sa bag-ong budget sa barangay wala usab mahisguti ang pagpahigayon sa maong kalihokan.

Si Konsehal Lim nagtuo nga usa kini ka seryoso nga hisgutanan nga angayan hatagan sa igong pagtagad aron nga masuta ang kamatuoran. Ang maong taho ni Lim giduso ni Konsehal Cabanlas ngadto sa komite sa ethics and blue ribbon nga iyang gipangulohan alang sa pagpahigayon sa gikinahanglang imbestigasyon. (SP/JRGalano/Photo by JBDacer)