Kakulangon sa pagpangandam hinungdan sa problema sa panubig sa COWD, Cabanlas

DAKO ang pagtoo ni Konsehal Edgar Cabanlas, chairman sa komite sa urban and rural poor and housing development, nga kun giplano ug gipreparahan sa mga tigdumala sa Water District dili masinati ug matagamtaman ang problema sa panubig.

Mao kini ang pamahayag sa konsehal atol sa sesyon sa konseho niadtong Lunes human gipresentar sa taga-Water District ang tukmang kahimtang sa panubig sa syudad. Kun gikan sa pagkamugna sa Cagayan De Oro Water District niadtong tuig 1973, gihikay na ang pagpalapad sa mga tinubdan sa tubig diin 16 mil pa ang mga konsumedor napangamdaman unta ang pag-abot sa 200 mil ka mga konsumedor.

Sumala ni Cabanlas nga ang rehabilitasyon sa mga tinubdan sa tubig maoy solosyon sa nasinate nga problema apan dako kaayo ang gasto ug nagkinahanlan sa igong pundo apan mapangitaan kini og pamaagi ug usa sa gisugyot mao ang pag-privatize sa COWD susama sa gihimo sa ubang dapit diin maayo ang natunol nga serbisyo ngadto sa ilang mga konsumedor.

Niini, si Engr. Antonio Young, general manager sa Water District, mibutyag nga ila nang nahan-ay ang master plan nga magtumbok sa pag-improbar sa ilang bulk water supply ug mipasalig nga dili sila babag sa unsa nga kaayuhan ug kalamboan aron matunol ang tukmang serbisyo ngadto sa katawhan.

Adunay igong kapasidad ug kasinati-an ang kadagkuan sa COWD nga masolosyonan gayud ang problema ug malikayan nga subling mahitabo ang natagamtam nga kakulangon sa supply sa tubig karong panahona, panglantaw ni Konsehal Edgar Cabanlas.