Kagay-anong 2nd placer sa MCU gipasidunggan

Gipasidunggan sa Konseho sa Syudad ni Bise Mayor Bebot Rodriguez ang Kagay-anong nakakuha sa ikaduhang pwesto sa lumba sa dagan.

Atol sa sesyon niadtong Lunes, hiniusang gisagop ang resolosyon nga nagpahalipay ug nagpasidungog ni Staff Sgt. Arnel Andilab kinsa nakakuha sa ikaduhang dapit sa 700K Mindanao Crazy Ultramarathon (MCU) 2023.

Si Andilab usa ka Kagay-anon ug miyembro sa Team CdO Runners Club nga misalmot sa maong kompetisyon nga nagsugod niadtong Hunyo 28, 2023 ug natapos niadtong Hulyo 6, 2023.

Ang ruta nagsugod didto sa Davao City agi sa Bukidnon paingon sa Cagayan de Oro City, Claveria ug Gingoog City sa Misamis Oriental ngadto na sa Butuan City, Montevista, Davao de Oro, Tagum City, Panabo City ug balik sa Davao City. Gitapos ni Andilab ang lumba sa dagan sulod lamang sa 174 ka oras, 16 minutos ug 12 segundos.

Si Konsehal John Micahel Seno, Chairman sa Komite sa Sports and Youth Development, nangamahan sa gisagop nga resolosyon, miingon nga gawas nga naghatag kini og dakong garbo sa dakbayan makaaghat usab kini sa ubang kabataan sa naangkong kalamposan.