Hugot nga pagmatikod sa ASF gihingusgan Abaday

Kusganong gihangyo ni Konsehal Roger Abaday, Chairman sa Komite sa Environment, ang mga hintungdang ahensya sa gobyerno nga ipatuman sa hingpit dinha sa mga checkpoints ang mga lakang pagseguro nga dili makasulod sa dakbayan ang African Swine Fever (ASF). Kini ang unod sa iyang special report atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Sumala sa konsehal nga adunay mga taho ang iyang nadawat nga adunay mga supplier sa baboy nga motipas sa dalan ug didto moagi sa diversion road aron malikayan ang checkpoint ug dili na masusi ang ilang dala nga baboy pasulod sa syudad.

Gikabalaka usab ni Abaday ang impormasyon apan angayan kining masuta pag-ayo nga adunay mga supplier nga maghatag og kwarta dinha sa mga checkpoint aron sayong makasulod ang ilang mga dalang baboy.

“Sa maong pamaagi dili na masunod ang gabayan nga dad-on didto sa Mambuaya diin nahimutang ang ekipo nga magsuta kun aduna bay ASF ang baboy,” pasabot ni Abaday.

Niini, gisugyot sa konsehal ang hugot nga pagtuman sa balaod aron malikay ang katawhan sa ASF ilabina kay nagsingabot na ang kapistahan sa syudad.

Ang maong taho ni Abaday giduso ni Bise Mayor Bebot Rodriguez ngadto sa sa Komite sa Panglawas ni Konsehal Malou Gaane ug sa iyang Komite sa Environment alang sa tukmang aksyon ug rekomendasyon.