Hangyong dili gamiton sa motorista ang Oro Boulevard tukion sa Public Works

MAGTIGOM karong alas 9:00 sa buntag diha sa hawanan sa Konseho, ang Komite sa Public Works nga dumalahon ni Konsehal John Michael Seno. Tukion sa maong tigom ang special report ni Konsehal James Judith kalabot sa iyang hangyo nga kun mahimo dili pasudlan ang Cagayan de Oro Boulevard sa mga salakyan o’ motorista tungod kay matod pa alanganin ang maong dalan.

Mahinumduman nga si Judith mipasabot nga wala nahisubay sa international standard specifications ang gitukod nga dalan ug dili haum nga himuong access road, gawas pa nga gihimo na kining suroyanan sa katawhan.

Gawas niini, gihangyo usab sa konsehal ang pag-instalar og portalets sa dapit aron mamintinar ang kahindik ug kalimpyo. Mahinumduman nga ang maong boulevard gitukod isip Flood Risk Control Dike ug gitumong alang sa paghatag og kaluwasan sa katawhan sa panahon sa kalamidad.

Niini, gidapit ni Seno nga motambong sa tigom sila si Konsehal Judith, City Administrator Atty. Roy Hilario Raagas, ug City Legal Officer Atty. Kenneth Tamala.