Hangyo sa mga kapunungan gitagad sa kom sa Urban Poor, Cabanlas


SA tinguha nga aron mapadali ang pagpalit sa lote nga gihanyo sa mga kapunungan nga ilang kasamtangan gi-okupahan gisugyot ni Konsehal Edgar Cabanlas, chairman sa komite Urban and Rural Poor and housing Development, nga mo-atubang ug mohangyo kini sa mayor ug ipadayag ang katuyu-an.

Atol sa tigom sa komite ni-adtong milabayng semana, gipasabot ni Cabanlas nga kun adunay panugot ug kun mo-ingon si Mayor Oscar Moreno nga paliton ang maong lote alang sa mga kabus mas labing maayo kay mapadali ang pag-proceso niini, sumpay ni Cabanlas.

Dugang sa konsehal nga andam kanunay ang komite sa Urban Poor sa pag-akomodar sa mga gikinahanlan ilabe na kun magka-uyon sa negosasyon ang tag-iya sa lote ug ang kagamhanang local.

Nasayran nga midangop ug mihanyo sa komite aron mapalit ang lote nga ilang giokupahan sa dugay na nga panahon ang Tierre Villa Verde Shelter and Livelihood Association Inc.sa Barangay Balulang ug mga molopyo sa usa ka lote sa Barangay Indahag ning syudad.