Goking misuporta sa programa sa BIR

HUGOT nga gisuportahan ni Konsehal George Goking, Chairman sa Komite sa Trade and Commerce, ang pamahayag sa Bureau of Internal Revenue (BIR) nga maglukat una og business permit sa dili pa magsugod ang operasyon sa negosyo.

Gipasabot nga subay sa balaod, gimando ang paglukat og business permit ug pagparehistro sa mga negosyo sa BIR aron legal ang operasyon ug malikayan nga mapahamtangan og multa.

Dugang pa, si Goking mipasabot nga sa pagpatuman sa Ease of Doing Business Law ang mga barangay mopahigayon og pagsusi sa mga negosyo sulod sa ilang teritoryo ug pagseguro nga walay nasupak nga probisyon sa balaod alang sa gitinguhang matang sa negosyo.

Ang tahas sa barangay mao ang padayon nga pagtugot sa mga bag-ong aplikante sa business permits uban sa pagmonitor sa mga renewal niini.

Niini, si Goking malaumon nga mapahigayon ang dugang pang pagpasabot sa kabarangayan sa balaod alang sa hapsay nga paglukat sa mga business permits and licenses. (APDelgra/SP)