Girlie nangusog mapatuman sa hingpit Safe Spaces Act

GILANTAW na mapatuman sa hingpit dinhi sa dakbayan sa Cagayan de Oro ang Republic Act 11313 kon Safe Spaces Act.


Kini human giduso ni konsehal Girlie Balaba ngadto sa konseho ubos ni bise mayor Kikang Uy ang sugyot ordinansa nga magpalapad sa implementasyon sa balaod dinhi sa syudad.


Ang maong balaod nagpalapad sa mga giya ug patakaran kalabot sa sexual harassment nga naglakip na sa verbal, non-verbal ug physical forms ug naghatag og kahigayonan sa mga lokal nga kagamhanan sa kaakuhan nga ipatuman ang balaod sa hingpit pinaagi sa pagpalabang og ordinansa nga magpahamtang og multa sa mga binuhatan kabahin sa gender-based sexual harassment.


Ang maong sugyot ordinansa nagmugna sa Safe Spaces Council nga langkoban sa mayor, CSWD officer, chairman sa Sangguniang Panlungsod komite sa social protection, representante sa Liga ng mga Barangay, tulo ka representante sa Civil Society organization, representante gikan sa interfaith, CSWD, COCPO, DILG, city legal, Oro Youth Development Office, SK, komisyon sa kababaehan ug Commission on Human Rights (CHR).


Niini, gipahamtang ang P5 mil nga multa ngadto sa mga establisamento nga mapakyas pagtamod sa probisyon sa balaod ug posibleng pagbakwi sa business permit kun balik balik na ang kalapasan. (SP)