Esparcia naninguha matul-id lubak lubak nga dalan dinha sa Canitoan-Bulua Road

Hugot nga gihangyo sa komite sa public works ni Konsehal John Michael Seno ang City Engineer’s Office nga hatagan sa pagtagad ang giingong ubay ubay nga mga bangag diha sa dalan nga nagkonektar sa Bulua ug Canitoan.

Kini human si Konsehal Bernie Esparcia, sa milabayng tigom sa komite, mitaho sa iyang namatikdang daghang lubak lubak o’ kinalotan sa maong dalan nga nakahatag og pelegro ilabina sa mga motorista nga gaagi sa maong dapit.

Niini, si Seno miingon nga kinahanglang tan-awon sa CEO ang ilang pag-isyu sa excavation permit kay sila ang ga-isyu angayang masayod sila sa ordinansa ilabina nga adunay pipila nga dili gasunod. Siya midugang nga pasabton usab ang mga permittes nga kun dili nila tumanon ang nahilatid sa ordinansa dili na sila tugutan sa ilang mga proyekto.

Sa iyang bahin, si Esparcia mihangyo sa CEO pagpahigayon og temporaryong solusyon ilabina nga gagmay kini nga mga dalan ug delikado sa mga motorista ug sa katawhan sa dakbayan.