Emano pabor pagbutang og road studs sa kadalanan

ALANG sa kapasegurogan sa atong mga motorista, pasahero ug mga lumalabay, suportado ni Konsehal Yevonna Yacine “Yvy” Emano ang sugyot ni Konsehal Edgar Cabanlas nga mabutangan og road studs o’ cat’s eye ang kadalanan.

Sa sesyon sa konseho niadtong Lunes nga gidumala ni Bise Mayor Jocelyn “Bebot” Rodriguez nga mabutangan og road studs o cat’s eye ang national ug secondary highways sa syudad aron malikayan ang disgrasya.

Si Emano midason nga lakip unta sa mahatagan sa tukmang aksyon sa mga hingtungdang ahensya sa gobyerno ang mga streetlights kun kini gasiga pa ba kay adunay pipila sama diha sa dalan sa barangay Indahag paingon sa Camaman-an nga wala na mosiga ug kuyaw alang sa mga motorista.

Lakip sa iyang gihangyo nga masusi ang bayronon sa kuryente sa syudad matag poste tungod kay nahulipan naman ang sodium lights sa led lights nga mas makabarato sa bayronon sa kuryente.

Niini, hugot nga gisuportahan ni Emano ang maong tinguha tungod sa kapasegurohan sa katawhan nga malikay sa mga aksidente sa kadalanan.