Emano misugyot marepaso internal security plan sa CDO

Kusganong gisugyot ni Konsehal Yvy Emano nga subling matun-an ang internal security plan sa syudad aron masiguro ang kahusay ug kalinaw ug magarantiya ang kapaseguroan sa katawhan ug mga dumuduong sa dakbayan ilabina sa nagsingabot nga kasaulogan sa tinuig nga pista. Kini ang unod sa special report ni Emano atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Emano nga namatikdan niya nga angayang ipalig-on pa sa awtoridad ang intelligence gathering aron mapakgang ang mga lihok sa dautang elemento nga adunay tinguha nga mohimo og krimen sa syudad sama sa pagpanulis nga nahitabo niadtong Agosto 2, 2023 dinha mismo sa sentrong bahin sa syudad ug ang nahitabong pagpamusil patay diha sa Upper Puerto nga nabaniog sa nasud.

Niini, malaumon si Emano nga malantaw ug matun-an pag-ayo ang pagpalig-on sa intelligence gathering tungod ug alang sa kapasigurohan sa katawhan sa dakbayan. Ang taho ni Emano giduso ni Bise Mayor Bebot Rodriguez ngadto sa Komite sa Public Order and Safety ni Konsehal Romeo Calizo alang sa tukmang aksyon ug rekomendasyon.