Emano mipasalamat sa DSWD AICS pay-out

GIPASALAMATAN ni Konsehal Yvy Emano, Chairman sa Komite sa Senior Citizens, ang Department of Social Welfare Development (DSWD)-10 sa pag-apod-apod sa Assistance to Individual in Crisis Situation (AICS) pay-out diha sa mga benepisaryo nga gipahigayon sa Barangay Kauswagan.

Ang AICS maoy usa sa social welfare services sa DSWD nga naghatag og tabang medikal, paglubong, transportasyon, edukasyon, pagkaon ug uban pang panginahanglanon sa usa ka pamilya.

Tumong sa maong programa nga matabangan ang mga kabus panahon sa krisis sa ilang kinabuhi aron matubag ang mga panginahanglan. Nasayran nga kapin sa P1.2 milyones ang gigahin sa DSWD alang sa 470 ka mga benepisyaryo sa programa sa tag-P3 mil matag usa.

Niini, malaumon si Emano nga makaabag sa ilang inadlaw adlaw nga kinabuhi ang gitunol nga ayuda sa gobyerno ug magamit usab kini dinha sa ilang mga panginahanglan.