Ease of Doing Business Ordinance suportado ni Goking

KUSGANONG gisuportahan ni Konsehal George Christopher Goking, chairman sa komite sa trade og commerce ang ordinansa  nga nag-amendar sa Section 32, Chapter 7 sa Ordinance No. 13992-2020, nga naila isip Ease of Doing of Business Ordinance sa dakbayan.

Kini ang gibutyag sa konsehal atol sa regular sesyon sa konseho niadtong Lunes nga gidumala ni Bise Mayor Bebot Rodriguez.

Matod ni Goking nga ang maong lakang usa ka produkto sa makuting diskusyon sa iyang komite.

Mahinungdanon kaayo kini nga lakang kay gawas nga matagaan og otonomiya ang mga barangay nga mag deklara sa kantidad sa ilang mga barangay fees base sa Bureau of Local Government Finance, Department of Finance, Department of the Interior and Local Government toolkit, dugang pagpalambo sa transparency, pagkaepisyente, ug mas paspas nga serbisyo alang sa atong mga negosyante ug publiko.

Daghang salamat sa kinatibuk-an ilabina sa tanang sakop sa EODB Technical Working Group, sa mga hintundang buhatan sa City Hall, mga ahensya sa dakbayan ug Liga ng mga Barangay nga nakigtambayayong sa paghulma sa maong pag-amendar aron makab-ot ang tumong ug tinguha sa maong ordinansa alang sa patas ug dakong kalamboan sa 80 ka barangay sa Siyudad. (RNQ/SP)