top of page

CPCC misusi sa gilarawng “Bagsakan” area


Si Konsehal George Goking mikuyog sa panon sa Cagayan de Oro Price Coordinating Council (CPCC) dinha sa pagpahigayon og pagbisita sa duha ka dapit nga gilarawng gamiton nga “Bagsakan” area sa mga produkto sa mga mag-uuma ug mangingisda dinha sa Barangay Agusan ug Canitoan.


Kini usa sa mga pamaagi sa CPCC aron mapatuman sa hingpit ang Consumer Welfare Act ug maprotektahan ang mga konsumante sa mga batakang palaliton. Tumong sa pagsusi ang pagtino nga haum ug angayan ang dapit sa gilaraw nga proyekto isip “Bagsakan” area sa Agricultural Productivity Operations Office.


Gitumbok nga makabenepisyo sa proyekto ang Tagpuangi Fisherfolk Association sa Agusan ug Canitoan Farmers Multi-Purpose Cooperative (CAFAMCO). Nasayran nga ang maong duha ka kapunungan maoy nag-unang exhibitors sa gipahigayong Kadiwa ug Tabo diha sa CDO City Hall Grounds ug uban pang institutional exhibits.


Si Goking mibutyag nga ang proyekto dako kaayo og ikatabang ngadto sa katawhan, sa mga mamaligyaay ug pumapalit, kay makuha ang mga produkto sa ubos nga presyo.


Kommentare


bottom of page