Calizo mihangyo sa COWD sa kopya sa ilang 5-yr development plan

GIPASALAMATAN  ni Konsehal Romeo Calizo, chairman sa komite sa  public utilities  si Fermin Jarales, Interim  Manager sa Cagayan de Oro Water District (COWD), sa temporaryong pagdumala niini.

Kini human gipresentar si Jarales ngadto sa komite  ang update sa ilang operasyon  lakip  na ang Comprehensive  Report nga ilang gisumite niadtong Enero 29, 2025 ngadto sa Local Water Utilities Administration  (LWUA) ingon man ang ilang  naaprobahan nga 5-Year Development Plan.

Matod ni Konsehal Calizo  nga subay sa dokumento,  kutob lang sa umaabot Pebrero 28  ning tuig  ang ilang termino  sa paglingkod  ug pagdumala diha sa COWD ug depende nalang kini  sa LWUA  kon  hatagan pa ba sila og  lugway.

Sa iyang bahin,  si Konsehal Judith  sa iyang pagsabot mibutyag nga ang gipadaplin  nga board ug GM sa COWD wala kini naglihok karon  kay anaa man ang mga interim  nga mipuli  apan  kon mahuman napod ang gihatag nga extension, mahimong  ang awtoridad niini mobalik  sa regular  nga board.

Samtang sa iyang bahin, si Jarales mipasabot  nga  sensero  ang iyang  pagserbisyo  sa tinguha nga makatabang apan   ang tanan  magdepende  kini  kon unsay desisyon nga ipakanaog sa LWUA.

Subay niini, gipasalamatan ni  Konsehal Calizo ang interim manager ug board sa COWD sa ilang pagserbisyo  ug paningkamot nga masolusyonan ang mga problema  ug mihangyo  nga mahatagan ang konseho sa kopya sa  ilang development plan aron  usab kini ilang makita  ang sulod sa maong plano. (JRGalano/SP)