Calizo miaksyon sa hangyo sa Oro Vista Homeowners

SI Konsehal Romeo Calizo, chairman sa komite sa Public Utilities, misugyot nga angayang tun-an pag-ayo ang mulo sa mga sakop sa Oro Vista Homeowners Association dinha sa Zone-10 Upper Carmen nga makutayan sa linya sa panubig.

Matud ni Calizo nga nakita na niya ang maong dapit ug taas-taas pa nga proceso ang angayang himoon tungod kay nagkinahanglan pa og panugot sa tag-iya sa pribadong lote nga maagi-an sa ipahimutang nga linya sa tubo sa Cagayan de Oro Water District (COWD) ingon man ang pagtino sa insaktong galastuhon.

Nasayran nga gatosan ka mga residente sa dapit ang mihangyo sa komite atol sa tigom sa milabayng adlaw nga makutayan og linya sa panubig.

Nunot niini, giuyonan sa komite nga temporaryong masolosyonan ang kakulangon pinaagi sa paghangyo sa buhatan ni Mayor Rolando Klarex Uy samtang mangita sa pamaagi nga matubag ang pangamuyo sa katawhan sa dapit.

Lakip sa gisugyot nga mahatag nga solosyon mao ang pag-supply sa tubig gamit ang water tank nga nakatabang ug nakahatag og serbisyo usab sa katawhan sa dakbayan.

Dako ang kalipay ug pagpasalamat sa mga molopyo sa aksyon nga gihimo sa komite. (SP/MLRapanot)