Cabaring nagusog masuportahan hangyo sa mga lumad sa Dansolihon

NANGUSOG si Konsehal Roberto Cabaring, chairman sa komite sa cultural communities, nga mahatagan sa kahigayon ang mga indigenous people nga nanag-iyag ancestral domain nga mapaangat ang ilang kinabuhi.

Sa iyang special report niadtong Lunes nga gidumala ni Bise Mayor Bebot Rodriguez, si Cabaring mihangyo nga matabangan ug masuportahan ang Dansolihon Ancestral Domain nga mahatagan og permiso nga maputol ang ilang tinanom nga mga kahoy tungod kay dako kini og ikatabang  sa paglambo sa ilang kinabuhi ug makatabang sa pagpa-eskwela sa ilang kabataan.

Sumala ni Cabaring nga sa miaging tuig, nadala na kini sa Konseho apan nakita sa komite nga adunay sanction sa Department of Environment and Natural Resources (DENR) hinungdan nga gibalik kini sa buhatan sa City Planning and Development Office (CPDO) aron makompleto ug mahan-ay ang plano nga gitawag og Ancestral Domain Sustainable Protection.

Gikabutyag nga kon makompleto na ang mga gikinahanglang rekisitos, ibalik kini sa konseho alang sa tukmang aksyon ug malaumon si Konsehal Cabaring  nga pinaagi sa kolaborasyon mahatagan og katumanan ang gipaninguha sa mga lumad  alang sa kaarangan sa ilang mga kinabuhi. (JRG/SP)