Cabaring nagpasalamat sa tanang misuporta sa IPs Month celebration

DAKO ang pasalamat ni Konsehal Roberto Cabaring sa tanan  nga misuporta ug nagpaluyo sa mga kalihukan nga giandam nunot sa kasaulugan sa ika-28 nga National Indigenous Peoples (IPs) month nga gipahigayon niadtong Oktubre 24 ning tuig diha sa Misamis Oriental Integrated Sports Complex.

Sa tinuig nga Indigenous Peoples Mandatory Representative (IPMR) address, gipahibalo sa konsehal ang mga kalamposan nga nakab-ot sa IP sector nga dako kaayo og gikatabang sa kinabuhi sa mga lumad sa dakbayan.

Mahinumduman nga ang kasaulogan gisugdan pinaagi sa usa ka ritwal ug gisundan  sa street parade nga gisalmotan  sa 17 ka cultural communities, cultural dance presentation, ug uban pa.

Si Konsehal Cabaring, chairman sa komite sa cultural communities sa konseho ug kinsa maoy nangulo  sa kasaulogan, inabagan sa City Social Welfare and Development Department-IPs Section, mapasalamaton sa tanan nagtabang alang sa kalamposan sa maong sadya ug mabulokon ang mga kalihokan. (JRG/SP)