Cabaring, CPDO hugot nga misuporta sa pagpahigayon sa interfacing

HUGOT nga gisuportahan sa komite sa cultural communities ubos ni Konsehal Roberto Cabaring ang sugyot sa Nahilaran Dansolihon Ancestral Domain nga mapahigayon ang interfacing sa ilang Ancestral Domain Sustainable Development and Protection Plan (ADSDPP).

Usa kini nga kalihokan diin imbitahon  ang Department of Environment and Natural Resources (DENR),  NCIP, City Local Environment and Natural Resources (CLENRO), City Planning and Development Office (CPDO), mga local functionaries ug mga sakop sa komite aron hingpit mahisgutan ang ilang ancestral boundary monuments aron ma plot kon asa kini sa mapa, aron usab makita kon wala nabay problema, pagsiguro nga dili magsukwahi ug aron usab masukip  ang  mga plano  ug programa sa  ilang ancestral domain ngadto sa Comprehensive Land Use Plan (CLUP) sa dakbayan.

Gipasabot sa taga CPDO nga gikinahanglan nga maimbitahan usab ang mga buhatan nga may kalabutan niini aron sila magiyahan tungod kay aduna rabay mga balaod sa national nga gikinahanglan nga tamdon kay forest area ang maong dapit.

Subay niini, gipasalamatan ni Konsehal Cabaring ang CPDO, NCIP ug ang tanan nga nagsuporta sa ilang mga plano ug gikalipay usab niya nga matitulohan ra gayod ang ilang ancestral domain ug ila nang madawat ang Certificate of Ancestral Domain Title. (JRG/SP)