Cabanlas personal nga mibisita sa mga biktima sa baha sa Bugo, Puerto

Personal nga gibisita ni Konsehal Edgar Cabanlas, chairman sa komite sa Urban and Rural Poor and Housing Development, ang mga biktima sa baha niadtong milabayng adlaw sa barangay Bugo ug Puerto aron masuta ang nahiagumang damyos ug makita ang kahimtang sa mga biktima.

Sumala ni Cabanlas nga dili ti-aw ang nahiaguman sa mga biktima sa maong pagbaha tungod kay adunay pipila kanila ang nawad-an sa ilang mga panimalay ug mga kabtangan nga ilang napundar sulod sa pipila ka mga katuigan ug nahanaw lang tungod sa maong kalamidad.

Niini, si Cabanlas miapod-apod og pagkaon ngadto sa mga biktima sa panghinaot nga bisan sa ginagmay nga tabang makahupay sa ilang gibati nga kaguol ug malaumon nga makabangon pagbalik sa nasinating trahedya.

Nunot niini, gihingusgan ni Cabanlas nga mangita ug pamaagi nga matabangan ang mga biktima pinaagi sa rekorso sa gobyerno ug nanawagan usab kini sa katawhan sa dakbayan nga adunay kaarangan sa ilang kinabuhi nga makatabang sa mga biktima sa baha.