Cabanlas naghanyo sa mga stall holder paghinlo sa ilang pwesto

SI Konsehal Edgar Cabanlas, chairman sa komite sa economic enterprises sa Konseho, nanawagan sa mga stall holder sa kamerkaduhan nga mahimong responsable ug tinod-on ang pagpanghinlo sa ilang mga pwesto aron presentable sa katawhan nga mga domo-ong.

Sumala ni Cabanlas nga ang pagbaton sa pwesto sa kamerkaduhan usa ka prebilihiyo nga gihatag sa goberno sa syudad busa dili angayan sayangan.

Kinahanglan gayod nga ilang tumanon ang gabayan bahin sa paghinlo sa ilang mga pwesto.

Gikahingawa sa konsehal ang nahitabo sa milabayng mga bulan diin hugaw ang merkado cogon tungod sa pagpasagad ug walay pagpakabana ug kooperasyon diin dili ilabay sa insaktong labayanan ang mga basura nga miresulta nga nagkatag sa kadaplinan.

Niini gipahimangnoan ni Konsehal Cabanlas ang mga mamaligya-ay sa kamerkaduhan nga dili siya magpanuko sa pag-isyu og Notice to Vacate niadtong mga malapason ug dili mosunod sa rekisitos nga gisita sa goberno. (MLR/SP)