Cabanlas miaksyon sa hangyo sa mga mag-uuma sa Baikingon

Gitinguha ni Konsehal Edgar Cabanlas, Chairman sa Komite sa Urban and Rural Poor and Housing Development, nga matubag ang hangyo sa Patingtingan Forestland and Integrated Farmers Association, Incorporated sa Barangay Baikingon nga mausab ang klasipikasyon sa loteng ilang giukopahan.

Sa milabayng tigom sa komite, giduso sa konsehal ngadto sa buhatan sa City Legal (CLO) ang hangyo nga mapalabang ang balaod nga mag-usab sa klasipikasyon sa Lot No. 10449 gikan sa timberland ngadto sa alienable and disposable land alang sa pagpahigayon og dugang pagtuon ug rekomendasyon. Si Cabanlas mipasabot nga andam kanunay ang syudad mopaluyo sa hangyo apan gusto niyang masiguro nga han-ay ug kompleto ang gikinahanlang mga dokumento ug rekisitos.

Niini, ang komite mipasaka og resolosyon nga naghanyo sa buhatan sa Presidente sa nasud, Department of Environment and Natural Resources (DENR) ug Kongressman Lordan Suan alang sa maong katuyuan.