Cabanlas malaumon mapatuman tukmang serbisyo dihas City Cemetery

Malaumon si Konsehal Edgar Cabanlas, chairman sa komite sa urban and rural poor and housing development ug City Cemetery Redevelopment Board, nga makab-ot ang maayong tinguha alang sa tiunay nga pagdumala sa Bolonsiri Cemetery.

Kini human nag-tigom ang mga sakop sa hunta ug mituki sa sugyot kabahin sa mga serbisyo ug bayronon nga ipahamtang sa maong sam-ang nga magahum sa mga kabus, ug gani ang gusto ni Mayor Klarex Uy nga dili na mahasol ang katawhan kay ang pag-improbar sa sam-ang dili aron magpaginansya kun dili aron masilbihan ang kinabag-ang katawhan sa dakbayan, sumpay ni Cabanlas.

Nunot niini, nagtoo si Cabanlas nga pinaagi sa kooperasyon ug pagtinabangay makab-ot ang mga tinguha ug pangandoy sa gobyerno nga ma-alagaran ang mga kabus sa dakbayan.

Abaday misugyot mapangitaa’g paagi mahipos mga ekipo sa quarry ops

Hugot nga gisugyot ni Konsehal Roger Abaday ngadto sa mga quarry operators kinsang quarry areas maagian sa mga white water river rafting nga mohimo’g mga pamaagi ug lakang nga dili makita ang ilang mga ekipo.

Kini agig tubag sa mulo nga gipaabot sa mga rafting outfitter atol sa hiniusang tigom sa komite sa environment ug tursimo sa milabayng semana.

Sa maong tigom, si Roldan Caamiño sa Oro Association of Rafters mipasabot nga dili gayud maayong tan-awon sa mga turista diha sa ilang pag-agi sa suba ang mga ekipo nga gigamit sa quarry operation ingon man ang kasaba niini.

Lisod ang pagpasundayag sa eco-tourism sa syudad kun ang makita sa mga turista mao ang ekipo ug padayong pagkalot sa kasubaan, dugang ni Caamiño.

Niini, gawas nga gilaraw sa duha ka komite ang personal nga pagsakay sa white water river rafting adventure gihangyo usab ni Abaday ang mga quarry operators paghimo sa mga pamaagi o bag-ong mga lakang nga dili makita ang ilang mga ekipo sa mga turista o’ sa parte sa suba nga ruta sa river rafting.