Cabanlas: Kompirmasyon sa konseho ni Kap. Tabac isip representante sa ABC wala na gikinahanglan

GIKLARO ni konsehal Edgar Cabanlas, Majority Floor Leader sa konseho, nga dili na kinahanlan ang kompirmasyon sa Konseho kang kapitan Marlou Tabac isip Ex-officio member nga maoy magrepresentar sa Liga ng Barangay sa syudad.

Kini ang gipadangat nga katin-awan ni Cabanlas atol sa unang sesyon niadtong lunes nga gidumala ni Bise Mayor Bebot Rodriguez.

Sumala ni Cabanlas nga ang posisyon sa presidente sa Liga ng Barangay automatic nga miembro sa konseho subay sa balaod, gani nalatid usab kana sa Constitution and By-Laws sa Liga, sumpay ni Cabanlas.

Siya midugang nga ang kasamtangang  gipasaka nga kaso batok ni Kap. Marlou Tabac sa Ombudsman ug sa komite sa Ethics and Blue Ribbon wala pa masugdi ug ang balaod nag-ingon presumption of innocence until proven guilty. Apan kon mahukman nga adunay nahimong kalapasan si Tabac, dili magmakuli ang konseho pagpapha kaniya sa katungdanan,”dugang ni cabanlas.

Gikahingawa ni  Cabanlas nga kon dili nato kini ma-desisyonan basin ug mag-atubang kita ug kaso ug mabalaka kita sa atong mga bag-ong kauban sa konseho.

Nunot niini, mayoriyang giuyonan sa konseho ang pag-hikling sa maong isyu sulod sa usa ka semana sa tuyo nga matino ang kompirmasyon sa National Liga ng Barangay. (MLRapanot/SP)