Cabanlas gitinguha ang limpyo, presentable nga merkado publiko

“KAY pribilehiyo man ang pagpamaligya, adunay kaakibat nga responsibilidad, kontribusyon ug mga buluhaton nga angay buhaton aron presentable tan-awon ang kamerkadohan.”

Kini ang gibutyag ni Konsehal Edgar Cabanlas, isip nagrepresentar ni Mayor Klarex Uy atol sa kasaulogan sa ika-20 ka tuig nga anibersaryo sa Cogon Market niadtong Hulyo 17-19, 2025.

Ang maong kasaulogan nga nagmalamposon gidumala sa kadagkoan sa  Cogon United Market Vendors Association (CUMVA) uban sa pag-abag sa buhatan sa City Economic Enterprises and Business Development Administration (CEEBDA).  

Gipahinumdoman sa konsehal nga kinahanglan magkahiusa ang tanang stakeholders sa Cogon Market ug magtinabangay sa pag-atiman sa mercado  aron matul-id ang dili maayo nga reputasyon niini nga labihan ka hugaw.

Ang pagmentinar sa usa ka limpyo ug presentable nga merkado publiko usa ka responsibilidad dili lamang  sa kagamhanan kundi gikinahanglan usab ang panagtambayayong sa mga vendors sulod mercado. (RNQ/SP/Photo from Councilor Cabanlas' FB page)