Balaba naninguha masolosyonan mulo sa mga PWDs


Gitinguha ni Konsehal Girlie Balaba, chairman sa komite sa Social Services, nga matunol sa kagamhanan ang mga batakang serbisyo alang sa mga adunay kabilinggan sa panglawas kon Persons with Disability (PWDs).

Kini human gituki atol sa milabayng tigom sa komite ang mga panginahanglanon sa grupo sa Deaf Association of Misamis Oriental (DAMOR), Incorporated.

Nasayran nga daghan sa ilang myembro ang nakasinati sa tanang matang sa diskriminasyon ilabina sa ilang pag-apply sa trabaho.

Giingon nga maglisod sila nga maka-empleyo tungod sa ilang kabilinggan sa pagkighinabi, nga dili makahibalo ang mga trabahante sa kompanya og sign language ug kasagaran kanila dili maka-afford paghire og interpreter.

Daghan usab kanila maayo ang panglawas ug adunay mga talento apan pakyas og nawad-an na sa kadasig nga makasulod sa trabaho aron unta mokita ug makasuporta sa ilang pamilya.

Gihangyo usab sa grupo nga makabaton unta og lahi nga lawak saringan alang sa mga adunay kabilinggan sa pandungog ug dili sila ikuyog sa mga normal nga mga tinun-an kay dili tanan magtutudlo makabalo og sign language.

Importante kaayo kanila ang komunikasyon alang sa ilang mga pagkakat-on.

Niini, giduso ni Konsehal Girlie Balaba alang sa dugang pagtoon ngadto sa komite sa Labor and Employment ang kabahin sa ilang pagpanarbaho ug sa komite sa edukasyon ni konsehal Suzette Magtajas-Daba alang sa dugang pagtuon sa natad sa edukasyon.