Balaba nangulo sa komite sa turismo sa Konseho

GIKALIPAY ni Konsehal Girlie Balaba nga nahatag kaniya ang chairmanship sa komite sa turismo sa Konseho.

Kini ang gibutyag sa konsehal human hiniusang giuyonan sa Konseho atol sa inaugural session niadtong Lunes nga gidumala ni Bise Mayor Bebot Rodriguez ang Resolusyon No. 15422-2025 nga naghan-ay sa Chairperson, Vice Chairperson ug mga Miyembro sa Standing Committees sa Konseho subay sa Internal Rules of Procedure (IRP) nga gisagop sa 21^st City Council.

Tipik sa gimbuhaton sa maong komite mao ang pagpahigayon ug mga tigum public hearing aron tukion, tun-an, imbestigahon ug ireport ang mga butang nga naglambigit sa pagpasiugda sa mga kalihokan sa arte ug kultura, pagpalambo ug promosyon sa turismo ug pagpatahom sa mga makasaysayanong mga dapit sa dakbayan ug mga butang nga naghulagway sa kinabuhi, kultura ug tradisyon sa sayudad sa Cagayan de Oro.

Dako ang paglaum ni Balaba nga mas mapalambo pa ang industriya sa turismo sa dakbayan. (RNQuiblat/SP)