Balaba misugyot pagpreserba sa SEARSOLIN Building

GIPANAWAGAN ni Konsehal Joyleen Mercedes “Girlie” Balaba ang pagpreserba sa makasaysayanong Southeast Asia Rural Social Leadership Institute (SEARSOLIN) building sulod sa Manresa Town taliwala sa nagpadayon nga “Campus of the Future” project sa Xavier University.

Sa iyang special report atol sa sesyon sa Konseho sa Dakbayan niadtong Lunes, Mayo 11, si Balaba mibutyag nga adunay mga XU alumni nga misupak sa maong Campus of the Future project nga gipasiugdahan sa developer nga Cebu Landmasters Inc. tungod sa kabalaka sa posibleng pagkawala sa maong estruktura.

Gitin-aw sa konsehal nga ang Searsolin building usa ka lig-ong kabilin nga nailhan sa paghulma og mga lider sa rural development gikan sa mga nasud sa Asia, Africa ug Oceania.

Gani, giila sa National Historical Commission of the Philippines ang kamahinungdanon niini.

Ang institusyon kabahin usab sa misyon ni Fr. William Masterson, SJ nga nagpunting sa pagpalambo sa social leadership ug rural development, dugang ni Balaba.

Tungod niini, gihangyo niya ang Konseho sa pagtan-aw kon ang maong building angay bang ipreserba, ikonserba, gamiton pag-usab pinaagi sa adaptive reuse, o gub-on isip kabahin sa redevelopment sa Manresa campus.

Ang maong taho giduso ni Bise Mayor Bebot Rodriguez ngadto sa komite sa turismo nga dumalaon ni Konsehal Juancho Pascual, vice chair sa maong komitiba, aron mahisgutan ang isyu.

Imbitahon usab sa hearing ang mga representante sa Xavier University ug Cebu Landmasters aron makahatag sa ilang posisyon kabahin sa proyekto ug sa kahimtang sa Searsolin building. (FDC/SP)