top of page

Balaba dismayadong gidid-an ang mga binuhing hayop pagsulod sa Oro Blvd

Gikadismaya ni Konsehal Girlie Balaba, Chairman sa Komite sa Social Services, ang pagdili sa mga pet-owners nga magdala sa ilang mga binuhing iro dinha sa Rio de Oro Boulevard subay sa giluwatang giya sa Regulatory and Compliance Board (RCB).


Kini ang pamahayag sa konsehal, atol sa sesyon sa Konseho niadtong Lunes nga gidumala ni Bise Mayor Bebot Rodriguez, sa taho ni Konsehal Roger Abaday kalabot sa mga saag kon “stray” nga mga mananap diha sa boulevard.

Gipahibalo usab sa konsehala nga lakip sa gidid-an nga dad-on dinha sa boulevard ang mga plastic water containers kay makahatag kini og dugang hugaw sa dapit.


Si Balaba miingon nga ang kagamhanan naghatag og igong pasidaan sa tanang mobisita ug maglakwatsa dinha sa boulevard nga mamahimong responsableng mga tag-iya sa ilang binuhi kun dalhon dinha sa dapit.


Apan, iyang gikadismaya nga wala gayud kini matuman sa mga gadala sa ilang binuhing hayop.

“Usa ako sa mga mahiligon ug mahigugmaon sa iro. Gani, aduna akoy 13 ka mga binuhing iro. Unta madala nako nga magsuroy dinha sa boulevard, apan tungod sa pagpasagad sa uban nawad-an na ako sa kahigayonan nga maglakaw-lakaw ug maka-ehersisyo dinha sa boulevard kuyog sa akong mga binuhi,” pasabot ni Balaba.

bottom of page