Asembliya sa mga sakop sa UNIHITRICO ipahigayon

GISUGYOT sa komite sa cultural communities sa konseho ubos ni Konsehal Roberto Cabaring ang pagpahigayon og asembliya sa mga sakop sa United Higaonon Tribal Council (UNIHITRICO).

Kini sa tinguha nga maresolbar ang mga isyu ug mahiusa ang nagkabahin bahin nga council nga naghatag og kalibog  ingon man kagubot sa ilang sektor.

Sayo pa, ang Tuburan Higaonon Tribal Council sa ilang gipahigayong  binulan nga tigom misagop og resolusyon  nga naghangyong  ilhon  sila sa konseho sa dakbayan  nga balidong sakop sa UNIHITRICO aron adunay silay kalinaw.

Sumala sa taga-NCIP ang problema anaa ra gayod sa ilang tugkaran  tungod kay sa giingong 12 ka nahabiling barangay nga sakop sa council, adunay tulo niini nga aduna pay bangi sa pagpangulo ingon man sa yuta kay nag-overlapping sa ilang mga claims.

Si konsehal Cabaring malaumon nga pinaagi sa maong asembliya  makab-ot ang panaghiusa ug kalinaw sa mga tribal council samtang gihangyo ang NCIP sa pagpahigayon og coordination meeting aron ilang maandam ang mga gikinahalang hisgotan atol sa asembliya. (JRG/SP)