Annual Budget sa SK sa Pagatpat tukion sa komite sa Sports

TUKION sa komite sa Sports and Youth Development sa konseho ni Konsehal John Michael Seno ang gidusong 2021 annual budget sa Sangguniang Kabataan (SK) sa Barangay Pagatpat, ning syudad.

Subay sa RA 10742 kon Sangguniang Kabataan Reform Act of 2015 gimando nga kinahanglan ang matag barangay mogahin og 10 porsyento gikan sa ilang general fund aron gamiton pagpatuman sa mga programa ug proyekto alang sa kabatan-onan.

Si Konsehal Seno mibutyag nga pinaagi sa mga nakahan-ay nga mga programa nga giandam kanila gilauman nga madasig ang kabatan-onan nga makiglambigit sa mga kalihokan ug hayan nga mabansay sila kon unsaon nga mahimong usa ka maayong lideres sa umaabot nga panahon.

Niini, si Konsehal Seno gipaabot mopatawag og tigom aron tukion ang gisumiting budget uban sa kadagkoan sa mga hintungdang departamento sa city hall ug mga opisyal sa barangay sa Pagatpat.